1
КъонтхъымкIэ ахэр о къыоупчIых. ЯIу: "Алахьымрэ Ащ илIыкIорэ къонтхъыр аIэ илъ, Алахьым ищынагъо шъугу ижъугъэлъ, шъуазфагу мамыр ижъугъэлъ, Тхьэр шъушIошъ хъугъэмэ, Алахьым, Ащ илIыкIо шъуафэIорышI!"
بِسْمِ اللَّهِ الرَّحْمَٰنِ الرَّحِيمِ يَسْأَلُونَكَ عَنِ الْأَنْفَالِ ۖ قُلِ الْأَنْفَالُ لِلَّهِ وَالرَّسُولِ ۖ فَاتَّقُوا اللَّهَ وَأَصْلِحُوا ذَاتَ بَيْنِكُمْ ۖ وَأَطِيعُوا اللَّهَ وَرَسُولَهُ إِنْ كُنْتُمْ مُؤْمِنِينَ
2
Тхьэр зышIошъ хъухэрэр Алахьым игугъу къызашIыкIэ, зыгу шъабэ хъухэрэр ары. Ащ иIэятэ къэгъэшъыпкъагъэхэм къафяджэхэ зыхъукIэ, шIошъхъуныгъэу ахэмэ яIэр нахь лъэш мэхъу, ахэр я Тхьэ щэгугъых,
إِنَّمَا الْمُؤْمِنُونَ الَّذِينَ إِذَا ذُكِرَ اللَّهُ وَجِلَتْ قُلُوبُهُمْ وَإِذَا تُلِيَتْ عَلَيْهِمْ آيَاتُهُ زَادَتْهُمْ إِيمَانًا وَعَلَىٰ رَبِّهِمْ يَتَوَكَّلُونَ
3
Зэпымыоу нэмаз зышIыхэрэр, Тэ къяттырэм щыщ агу пыкIэу зытыхэрэр ахэр ары.
الَّذِينَ يُقِيمُونَ الصَّلَاةَ وَمِمَّا رَزَقْنَاهُمْ يُنْفِقُونَ
4
Ахэр шъыпкъэм тетэу Тхьэр зышIошъ хъухэрэр ары, Ахэмэ яIахьэу къафигъэгъущтыри хьалэлэу къаритыщтыри Алахьым дэжь щыI.
أُولَٰئِكَ هُمُ الْمُؤْمِنُونَ حَقًّا ۚ لَهُمْ دَرَجَاتٌ عِنْدَ رَبِّهِمْ وَمَغْفِرَةٌ وَرِزْقٌ كَرِيمٌ
5
Шъыпкъэр къыушыхьатынэу о уи Тхьэ уиунэ укъызырещым, Тхьэр зышIошъ хъурэмэ ащыщ куп къыппэуцужьыщтыгъ.
كَمَا أَخْرَجَكَ رَبُّكَ مِنْ بَيْتِكَ بِالْحَقِّ وَإِنَّ فَرِيقًا مِنَ الْمُؤْمِنِينَ لَكَارِهُونَ
6
Шъыпкъэр нафэ къызыхъугъэм ыуж ар зыфэдэмкIэ о къыонэкъокъужьхэу, хьадэгъум алъэгъузэ рафылIэщтыгъэхэм фэдэу къыпэуцужьыщтыгъэх.
يُجَادِلُونَكَ فِي الْحَقِّ بَعْدَمَا تَبَيَّنَ كَأَنَّمَا يُسَاقُونَ إِلَى الْمَوْتِ وَهُمْ يَنْظُرُونَ
7
Мары, купитIум языр къышъуфэгъэзагъэ хъунэу Алахьым шъукъигъэгугъэгъагъ. Шъуфэягъ Iашэр зымыIыгъыр къышъуфэгъэзагъэ хъуным, ау Алахьыр фэягъ Ежь игущыIэхэмкIэ шъыпкъэр зэрэшъыпкъэр къыгъэлъэгъоным, аужырэ цIыфым нэсэу джаурхэм алъапсэ кIиутыным,
وَإِذْ يَعِدُكُمُ اللَّهُ إِحْدَى الطَّائِفَتَيْنِ أَنَّهَا لَكُمْ وَتَوَدُّونَ أَنَّ غَيْرَ ذَاتِ الشَّوْكَةِ تَكُونُ لَكُمْ وَيُرِيدُ اللَّهُ أَنْ يُحِقَّ الْحَقَّ بِكَلِمَاتِهِ وَيَقْطَعَ دَابِرَ الْكَافِرِينَ
8
укIакIохэм агу римыхь нахь мышIэми, шъыпкъэр зэрэшъыпкъэр къыгъэлъэгъоным, пхэнджыр зэрэпхэнджыр къычIигъэщыным пае.
لِيُحِقَّ الْحَقَّ وَيُبْطِلَ الْبَاطِلَ وَلَوْ كَرِهَ الْمُجْرِمُونَ
9
Шъуи Тхьэ IэпыIэгъу къышъуитынэу шъуелъэIу зэхъум, Ащ шъукъызэхихи, джэуап къышъуитыжьыгъ: "Сатырэу зэготхэу, зэуж итхэу къэкIорэ мэлэIич минкIэ Сэ IэпыIэгъу сыкъышъуфэхъущт!"
إِذْ تَسْتَغِيثُونَ رَبَّكُمْ فَاسْتَجَابَ لَكُمْ أَنِّي مُمِدُّكُمْ بِأَلْفٍ مِنَ الْمَلَائِكَةِ مُرْدِفِينَ
10
Шъугухэр ыгъэрэхьатынхэм пае ар къэбар гушIогъо къодыеу Алахьым къышIыгъ. ТекIоныгъэр Алахьым дэжь къекIы. шъыпкъэ дэдэмкIэ, Алахьыр лъапIэ, Iуш!
وَمَا جَعَلَهُ اللَّهُ إِلَّا بُشْرَىٰ وَلِتَطْمَئِنَّ بِهِ قُلُوبُكُمْ ۚ وَمَا النَّصْرُ إِلَّا مِنْ عِنْدِ اللَّهِ ۚ إِنَّ اللَّهَ عَزِيزٌ حَكِيمٌ
11
Мары, ухъумакIоу Ар зэрэшъуиIэр къыгъэнафэу, Ащ чъыер къышъушъхьаригъэуагъ, шъуигъэкъэбзэнэу, шэйтаным ибзэджэшIагъэхэр шъухигъэкIынэу, шъугухэр ыгъэчэфынэу, ащкIэ шъулъэхэр ыгъэпытэнэу уашъом ощхыр къышъуфыригъэхыгъ.
إِذْ يُغَشِّيكُمُ النُّعَاسَ أَمَنَةً مِنْهُ وَيُنَزِّلُ عَلَيْكُمْ مِنَ السَّمَاءِ مَاءً لِيُطَهِّرَكُمْ بِهِ وَيُذْهِبَ عَنْكُمْ رِجْزَ الشَّيْطَانِ وَلِيَرْبِطَ عَلَىٰ قُلُوبِكُمْ وَيُثَبِّتَ بِهِ الْأَقْدَامَ
12
Мары, о уи Тхьэ мэлэIичмэ макъэ аригъэIугъ: "Сэ сышъуигъус, шIошъхъуныгъэ шъыпкъэ зышIыгъэмэ агухэр жъугъэпытэх! ШIошъхъуныгъэ шъыпкъэ зимыIагъэхэм агумэ Сэ щынагъо арысыдзэщт,ахэмэ апшъэ шъудау, аIэхъуамбэхэм шъуяу!"
إِذْ يُوحِي رَبُّكَ إِلَى الْمَلَائِكَةِ أَنِّي مَعَكُمْ فَثَبِّتُوا الَّذِينَ آمَنُوا ۚ سَأُلْقِي فِي قُلُوبِ الَّذِينَ كَفَرُوا الرُّعْبَ فَاضْرِبُوا فَوْقَ الْأَعْنَاقِ وَاضْرِبُوا مِنْهُمْ كُلَّ بَنَانٍ
13
Арэущтэу зыкIэшъушIыщтыр ахэр Алахьым, Ащ илIыкIо зэрагокIыгъэхэм пай. Алахьымрэ Ащ илIыкIорэ агокIырэр Алахьым пщыныжьыкIаекIэ егъэпщынэ!
ذَٰلِكَ بِأَنَّهُمْ شَاقُّوا اللَّهَ وَرَسُولَهُ ۚ وَمَنْ يُشَاقِقِ اللَّهَ وَرَسُولَهُ فَإِنَّ اللَّهَ شَدِيدُ الْعِقَابِ
14
Ар шъощ пай! Ащ итхъагъо зэхашъушIэ, джаурмэ афыщылъыр машIокIэ пщынэнхэр ары!
ذَٰلِكُمْ فَذُوقُوهُ وَأَنَّ لِلْكَافِرِينَ عَذَابَ النَّارِ
15
ШIошъхъуныгъэ шъыпкъэ зышIыгъэхэр! ДзэкIо сатырхэу къышъупэшIуекIохэу джаурмэ шъуазыIукIэкIэ, шъуакIыб афэшъумыгъаз.
يَا أَيُّهَا الَّذِينَ آمَنُوا إِذَا لَقِيتُمُ الَّذِينَ كَفَرُوا زَحْفًا فَلَا تُوَلُّوهُمُ الْأَدْبَارَ
16
Зэоным зыфагъэзэным е купым гъусэ фэхъунхэм пае щымытэу а мафэм ахэмэ зыкIыб афэзгъазэрэм Алахьым игубж лъэш къытефэщт. Ащ фэдэм шъхьэегъэзыпIэ фэхъущтыр джэхьнэм машIор ары, ар шъхьэегъэзыпIэ щынагъу!
وَمَنْ يُوَلِّهِمْ يَوْمَئِذٍ دُبُرَهُ إِلَّا مُتَحَرِّفًا لِقِتَالٍ أَوْ مُتَحَيِّزًا إِلَىٰ فِئَةٍ فَقَدْ بَاءَ بِغَضَبٍ مِنَ اللَّهِ وَمَأْوَاهُ جَهَنَّمُ ۖ وَبِئْسَ الْمَصِيرُ
17
Шъорэп ахэр зыукIыщтыгъэхэр, Алахьым ахэр ыукIыщтыгъэх, щэбзащэр, пчыр бдзы зэхъум, орэп зыдзыгъэр, Алахьым ахэр ыдзыщтыгъэх. Ар аущтэу зыкIэхъугъэр шIошъхъуныгъэ шъыпкъэ зышIыгъэхэр ушэтынышIукIэ Ащ ыушэтынхэм пай. Шъыпкъэ дэдэмкIэ, Алахьым зэхехы, ешIэ!
فَلَمْ تَقْتُلُوهُمْ وَلَٰكِنَّ اللَّهَ قَتَلَهُمْ ۚ وَمَا رَمَيْتَ إِذْ رَمَيْتَ وَلَٰكِنَّ اللَّهَ رَمَىٰ ۚ وَلِيُبْلِيَ الْمُؤْمِنِينَ مِنْهُ بَلَاءً حَسَنًا ۚ إِنَّ اللَّهَ سَمِيعٌ عَلِيمٌ
18
Шъощ пае аущтэу зыкIишIырэр джаурмэ ятхьагъэпцIыгъэ Алахьым хъыбэи ышIы шIоигъошъ ары.
ذَٰلِكُمْ وَأَنَّ اللَّهَ مُوهِنُ كَيْدِ الْكَافِرِينَ
19
Шъо текIоныгъэм шъукIэлъэIущтыгъэмэ, текIоныгъэр къышъуфэкIуагъ. ЗышъуIажэмэ, шъоркIэ ар нахьышIу, ау жъугъэзэжьмэ, Тэри дгъэзэжьыщт. Шъо цIыфыбэ шъузэрэхъурэр зыпарэкIи IэпыIэгъу къышъуфэхъущтэп Алахьыр шIошъхъуныгъэ шъыпкъэ эиIэмэ ягъус.
إِنْ تَسْتَفْتِحُوا فَقَدْ جَاءَكُمُ الْفَتْحُ ۖ وَإِنْ تَنْتَهُوا فَهُوَ خَيْرٌ لَكُمْ ۖ وَإِنْ تَعُودُوا نَعُدْ وَلَنْ تُغْنِيَ عَنْكُمْ فِئَتُكُمْ شَيْئًا وَلَوْ كَثُرَتْ وَأَنَّ اللَّهَ مَعَ الْمُؤْمِنِينَ
20
О шIошъхъуныгъэ шъыпкъэ зышIыгъэхэр! Алахьым, Ащ илIыкIо шъуафэIорышI, шъукъэдаIо пэтзэ, Ащ шъугомыкI.
يَا أَيُّهَا الَّذِينَ آمَنُوا أَطِيعُوا اللَّهَ وَرَسُولَهُ وَلَا تَوَلَّوْا عَنْهُ وَأَنْتُمْ تَسْمَعُونَ
21
"Тэ зэхэтхыгъэ" зыIоу къэмыдаIорэмэ афэдэ шъумыхъу.
وَلَا تَكُونُوا كَالَّذِينَ قَالُوا سَمِعْنَا وَهُمْ لَا يَسْمَعُونَ
22
Алахьым ыпашъхьэ хьэйуанхэмэ анахь щыдэйхэу дэгу-псыгухэр зыпари къызгурымыIохэрэр арых.
إِنَّ شَرَّ الدَّوَابِّ عِنْدَ اللَّهِ الصُّمُّ الْبُكْمُ الَّذِينَ لَا يَعْقِلُونَ
23
Дэгъу горэ ахэмэ ахэлъэу Алахьым ышIыгъэмэ, зэхахэу Ащ ышIыни, зэхахынэу ахэр ышIыгъэхэмэ, гокIынхи, акIыб Ащ къыфагъэзэни.
وَلَوْ عَلِمَ اللَّهُ فِيهِمْ خَيْرًا لَأَسْمَعَهُمْ ۖ وَلَوْ أَسْمَعَهُمْ لَتَوَلَّوْا وَهُمْ مُعْرِضُونَ
24
О шIошъхъуныгъэ шъыпкъэ зышIыгъэхэр! Шъо псэ къышъупызгъакIэрэм ащ шъуфищэ зыхъукIэ, Алахьым, Ащ илIыкIо джэуап къяшъутыжь. ЦIыфымрэ ыгурэ азфагу Алахьыр зэритыр, Ащ дэжь шъо шъузэрагъэхьазырыжьыщтыр зэжъугъашIэ!
يَا أَيُّهَا الَّذِينَ آمَنُوا اسْتَجِيبُوا لِلَّهِ وَلِلرَّسُولِ إِذَا دَعَاكُمْ لِمَا يُحْيِيكُمْ ۖ وَاعْلَمُوا أَنَّ اللَّهَ يَحُولُ بَيْنَ الْمَرْءِ وَقَلْبِهِ وَأَنَّهُ إِلَيْهِ تُحْشَرُونَ
25
Шъо шъуащыщхэу мызафэхэми ямызакъоу ушэтынэу къышъуфэкIощтхэм шъуащыщын. УигъэпщынэнкIэ Алахьыр зэрэлъэшыр зэжъугъашIэ.
وَاتَّقُوا فِتْنَةً لَا تُصِيبَنَّ الَّذِينَ ظَلَمُوا مِنْكُمْ خَاصَّةً ۖ وَاعْلَمُوا أَنَّ اللَّهَ شَدِيدُ الْعِقَابِ
26
Зыщышъумыгъэгъупш: мы чIыгум шъо цIыфышъхьэ макIэу шъутетыгъ, шъухъыбэигъ. А цIыфхэм шъузэрагъэкIодыщтым шъущыщын, ау Ащ псэупIэ къышъуитыгъ, иIэпыIэгъукIэ шъулъапсэ ыгъэпытагъ, шхыныгъошIухэр къышъуитыгъэх, разэ шъухъункIи мэхъу!
وَاذْكُرُوا إِذْ أَنْتُمْ قَلِيلٌ مُسْتَضْعَفُونَ فِي الْأَرْضِ تَخَافُونَ أَنْ يَتَخَطَّفَكُمُ النَّاسُ فَآوَاكُمْ وَأَيَّدَكُمْ بِنَصْرِهِ وَرَزَقَكُمْ مِنَ الطَّيِّبَاتِ لَعَلَّكُمْ تَشْكُرُونَ
27
О шIошъхъуныгъэ шъыпкъэ зышIыгъэхэр! Алахьыми мы лIыкIоми мэхъэджагъэкIэ шъуапэмыгъокI, ар къыжъугурэIошъ, зым адырэм цыхьэ фишIынымкIэ мэхъэджагъэ къызхэшъумыгъаф.
يَا أَيُّهَا الَّذِينَ آمَنُوا لَا تَخُونُوا اللَّهَ وَالرَّسُولَ وَتَخُونُوا أَمَانَاتِكُمْ وَأَنْتُمْ تَعْلَمُونَ
28
Шъо шъуимылъкуи шъуикIалэхэри ушэтыных ныIэп, тын лъапIэр Алахьым дэжь щыI.
وَاعْلَمُوا أَنَّمَا أَمْوَالُكُمْ وَأَوْلَادُكُمْ فِتْنَةٌ وَأَنَّ اللَّهَ عِنْدَهُ أَجْرٌ عَظِيمٌ
29
О шIошъхъуныгъэ шъыпкъэ зышIыгъэхэр! Алахьым ищынагъо шъугу илъ хъумэ, шIумрэ емрэ Ащ зэхэшъуфы шъуишIыщт, бзэджэшIагъэу шъуиIэхэр шъутырихынхэшъ, къышъуфигъэгъущт. Шъыпкъэ дэдэмкIэ, шIушIэ лъапIэр Алахьым ыIэ илъ!
يَا أَيُّهَا الَّذِينَ آمَنُوا إِنْ تَتَّقُوا اللَّهَ يَجْعَلْ لَكُمْ فُرْقَانًا وَيُكَفِّرْ عَنْكُمْ سَيِّئَاتِكُمْ وَيَغْفِرْ لَكُمْ ۗ وَاللَّهُ ذُو الْفَضْلِ الْعَظِيمِ
30
О лъэхъу къыптыралъхьаным, е уаукIыным, е уипсэупIэ укъырафыным пае джаурмэ хъор-шэрыгъэхэр зэрахьэх, Алахьым яхъор=шэрыкIэ къычIегъэщы, Алахьыр хъор=шэрынымкIэ нахьышIу!
وَإِذْ يَمْكُرُ بِكَ الَّذِينَ كَفَرُوا لِيُثْبِتُوكَ أَوْ يَقْتُلُوكَ أَوْ يُخْرِجُوكَ ۚ وَيَمْكُرُونَ وَيَمْكُرُ اللَّهُ ۖ وَاللَّهُ خَيْرُ الْمَاكِرِينَ
31
Ахэмэ Тэ тиIэятэ къэгъэшъыпкъагъэмэ къафяджэхэ зыхъукIэ, аIо: "Тэ ахэр зэхэтхыгъагъэх: Тэри тыфэягъэмэ, ар дэдэр къэтIони. Ахэр ижъырэ тарихъых ныIэп!"
وَإِذَا تُتْلَىٰ عَلَيْهِمْ آيَاتُنَا قَالُوا قَدْ سَمِعْنَا لَوْ نَشَاءُ لَقُلْنَا مِثْلَ هَٰذَا ۙ إِنْ هَٰذَا إِلَّا أَسَاطِيرُ الْأَوَّلِينَ
32
Мары, ахэмэ аIощтыгъэ: "Ярэби я Алахь! Ар о уадэжь къикIырэ шъыпкъэмэ, мыжъо ощх уашъом къытфегъэх е нэмыкI хьэзаб пщынэжь къытфэгъакIу".
وَإِذْ قَالُوا اللَّهُمَّ إِنْ كَانَ هَٰذَا هُوَ الْحَقَّ مِنْ عِنْدِكَ فَأَمْطِرْ عَلَيْنَا حِجَارَةً مِنَ السَّمَاءِ أَوِ ائْتِنَا بِعَذَابٍ أَلِيمٍ
33
О уазыщыхэтым ахэр ыгъэпщынэнхэу Алахьыр щытэп, афигъэгъунэу зыщылъаIохэрэм, Алахьым ахэр ыгъэпщынэщтхэп.
وَمَا كَانَ اللَّهُ لِيُعَذِّبَهُمْ وَأَنْتَ فِيهِمْ ۚ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ
34
Ау ахэмэ нэмыкIхэр Альмэсджыд альхьэрам мэщытым пэчыжьэ зыщашIырэм, ащ иухъумакIохэу зыщымытым, Алахьым ипщыныжь ахэмэ щагъэзыен алъэкIыщтэп. Ащ иухъумакIохэр диныр зыгу илъхэр ары, ахэмэ ащыщыбэмэ ар ашIэрэп!
وَمَا لَهُمْ أَلَّا يُعَذِّبَهُمُ اللَّهُ وَهُمْ يَصُدُّونَ عَنِ الْمَسْجِدِ الْحَرَامِ وَمَا كَانُوا أَوْلِيَاءَهُ ۚ إِنْ أَوْلِيَاؤُهُ إِلَّا الْمُتَّقُونَ وَلَٰكِنَّ أَكْثَرَهُمْ لَا يَعْلَمُونَ
35
А унэм ыпашъхьэ ахэмэ дыухьэ къызэрэщахьырэр шъуенымрэ Iэгу теонымрэ ары ныIэп. шъо ШъушIошъ зэрэмыхъущтыгъэм пае пщынэжьыр зэхашъушIэ!
وَمَا كَانَ صَلَاتُهُمْ عِنْدَ الْبَيْتِ إِلَّا مُكَاءً وَتَصْدِيَةً ۚ فَذُوقُوا الْعَذَابَ بِمَا كُنْتُمْ تَكْفُرُونَ
36
Шъыпкъэ дэдэмкIэ, шIошъхъуныгъэ шъыпкъэ зимыIагъэхэм Алахьым игъогу дагъэхынхэм пае ямылъку агъэкIоды, ахэмэ ар агъэкIодыщт. ЕтIанэ ар гухэкI афэхъужьыщт, етIанэ ахэмэ атекIощтых. ШIошъхъуныгъэ шъыпкъэ зимыIэхэр джыхьнэм пашъхьэм щаугъоищтых.
إِنَّ الَّذِينَ كَفَرُوا يُنْفِقُونَ أَمْوَالَهُمْ لِيَصُدُّوا عَنْ سَبِيلِ اللَّهِ ۚ فَسَيُنْفِقُونَهَا ثُمَّ تَكُونُ عَلَيْهِمْ حَسْرَةً ثُمَّ يُغْلَبُونَ ۗ وَالَّذِينَ كَفَرُوا إِلَىٰ جَهَنَّمَ يُحْشَرُونَ
37
Алахьым бзаджэхэр хьалэлмэ къахихынхэм, бзаджэхэр зым ыкIыIу адырэр телъэу зэхигукIэнхи, джыхьынэмым рилъхьанхэм пае. Ахэр чIэнагъэ зышIыгъэхэр ары.
لِيَمِيزَ اللَّهُ الْخَبِيثَ مِنَ الطَّيِّبِ وَيَجْعَلَ الْخَبِيثَ بَعْضَهُ عَلَىٰ بَعْضٍ فَيَرْكُمَهُ جَمِيعًا فَيَجْعَلَهُ فِي جَهَنَّمَ ۚ أُولَٰئِكَ هُمُ الْخَاسِرُونَ
38
ШIошъхъуныгъэ шъыпкъэ зимыIагъэхэм яIу: "Ахэмэ заIажэмэ, ыпэкIэ ашIэгъагъэр афагъэгъущт, ау а дэдэр ашIэ хъумэ, адырэ лъэпкъымэ къяхъулIагъэр ахэмкIэ щысэ хъущт.
قُلْ لِلَّذِينَ كَفَرُوا إِنْ يَنْتَهُوا يُغْفَرْ لَهُمْ مَا قَدْ سَلَفَ وَإِنْ يَعُودُوا فَقَدْ مَضَتْ سُنَّتُ الْأَوَّلِينَ
39
Дэхьыхыныгъэ гори щымыIэжь охъуфэ, диныр зэрэщытэу Алахьым ыIэ илъ охъуфэ, ахэмэ шъуязау. Ау ахэмэ заIажэмэ, Алахьым къелъэгъу ашIэрэр!
وَقَاتِلُوهُمْ حَتَّىٰ لَا تَكُونَ فِتْنَةٌ وَيَكُونَ الدِّينُ كُلُّهُ لِلَّهِ ۚ فَإِنِ انْتَهَوْا فَإِنَّ اللَّهَ بِمَا يَعْمَلُونَ بَصِيرٌ
40
Ау ахэр зэкIэкIожьхэмэ, зэжъугъашIэ, Алахьыр шъо шъуиухъумакIу. Ар ухъумэкIо шIагъу, IэпыIэгъу шIагъу.
وَإِنْ تَوَلَّوْا فَاعْلَمُوا أَنَّ اللَّهَ مَوْلَاكُمْ ۚ نِعْمَ الْمَوْلَىٰ وَنِعْمَ النَّصِيرُ
41
Шъо Алахьым, шIумрэ емрэ зыщызэхафыщт мафэм Тэ тиIумэт къыфедгъэхыгъэм, дэитIур зыщызэIукIэщт мафэм шIошъхъуныгъэ шъыпкъэ афэшъушIыгъэу щытмэ, сыд фэдэ къонтхъ шъуштагъэми, зэжъугъашIэ: ызытфанэ Алахьым, лIыкIом, ащ иIахьылхэм, ибэхэм, тхьамыкIэхэм, гъогу тетхэм апай. Алахьым ыIэ къимыхьан щыIэп!
وَاعْلَمُوا أَنَّمَا غَنِمْتُمْ مِنْ شَيْءٍ فَأَنَّ لِلَّهِ خُمُسَهُ وَلِلرَّسُولِ وَلِذِي الْقُرْبَىٰ وَالْيَتَامَىٰ وَالْمَسَاكِينِ وَابْنِ السَّبِيلِ إِنْ كُنْتُمْ آمَنْتُمْ بِاللَّهِ وَمَا أَنْزَلْنَا عَلَىٰ عَبْدِنَا يَوْمَ الْفُرْقَانِ يَوْمَ الْتَقَى الْجَمْعَانِ ۗ وَاللَّهُ عَلَىٰ كُلِّ شَيْءٍ قَدِيرٌ
42
Мары, шъо лъэгэпIэ благъэм шъутетыгъ, адырэхэр лъэгэпIэ чыжьэм тетыгъэх, гъогурыкIохэр шъуахэкIэ щыIагъэх. ЧIыпIэмрэ уахътэмрэ зэфэжъугъэнэфэжьхэу шъуежьэгъагъэмэ, чIыпIэмрэ уахътэмрэ жъугъэнэфэнымкIэ шъузэгурыIоныеп, ау ар аущтэу зыкIэхъугъэр къэхъун фэягъэр Алахьым къыгъэхъуным пай, шIокIыпIэ имыIэу хэкIодэн фаер хэкIодэным, шIокIыпIэ имыIэу щыIэн фаер псаоу къэнэным пай. Шъыпкъэ дэдэмкIэ, Алахьым зэхехы, ешIэ!
إِذْ أَنْتُمْ بِالْعُدْوَةِ الدُّنْيَا وَهُمْ بِالْعُدْوَةِ الْقُصْوَىٰ وَالرَّكْبُ أَسْفَلَ مِنْكُمْ ۚ وَلَوْ تَوَاعَدْتُمْ لَاخْتَلَفْتُمْ فِي الْمِيعَادِ ۙ وَلَٰكِنْ لِيَقْضِيَ اللَّهُ أَمْرًا كَانَ مَفْعُولًا لِيَهْلِكَ مَنْ هَلَكَ عَنْ بَيِّنَةٍ وَيَحْيَىٰ مَنْ حَيَّ عَنْ بَيِّنَةٍ ۗ وَإِنَّ اللَّهَ لَسَمِيعٌ عَلِيمٌ
43
Мары, ахэр япчъагъэкIэ макIэхэу Алахьым пкIыхьыкIэ уигъэлъэгъугъ, ау ахэр бэ хъухэу уигъэлъэгъугъагъэхэмэ, кIочIаджэ шъухъуни, а Iофым фэгъэхьыгъэу шъузэнэкъокъоу ежъугъэжьэжьыни, ау Алахьым шъуигъэгупсэфыгъ. шъугу илъыр Ащ ешIэ!
إِذْ يُرِيكَهُمُ اللَّهُ فِي مَنَامِكَ قَلِيلًا ۖ وَلَوْ أَرَاكَهُمْ كَثِيرًا لَفَشِلْتُمْ وَلَتَنَازَعْتُمْ فِي الْأَمْرِ وَلَٰكِنَّ اللَّهَ سَلَّمَ ۗ إِنَّهُ عَلِيمٌ بِذَاتِ الصُّدُورِ
44
Мары, шъо шъузызэIокIэм, Алахьым къэхъун фаер къыгъэхъуным пае, ахэр макIэ хъухэу шъунэхэм къаригъэлъэгъугъ, адырэмэ шъукIочIаджэу шъуаригъэлъэгъугъ. Къэхъущт=къэшIэщтыр Алахьым ыIэ илъ!
وَإِذْ يُرِيكُمُوهُمْ إِذِ الْتَقَيْتُمْ فِي أَعْيُنِكُمْ قَلِيلًا وَيُقَلِّلُكُمْ فِي أَعْيُنِهِمْ لِيَقْضِيَ اللَّهُ أَمْرًا كَانَ مَفْعُولًا ۗ وَإِلَى اللَّهِ تُرْجَعُ الْأُمُورُ
45
О шIошъхъуныгъэ шъыпкъэ зышIыгъэхэр! Дзэ горэм шъузыIукIэкIэ, пытагъэ зыхэжъугъэлъ. Алахьыр бэрэ шъугу къэжъугъэкI, гъэхъагъэ шъуиIэнкIи мэхъу!
يَا أَيُّهَا الَّذِينَ آمَنُوا إِذَا لَقِيتُمْ فِئَةً فَاثْبُتُوا وَاذْكُرُوا اللَّهَ كَثِيرًا لَعَلَّكُمْ تُفْلِحُونَ
46
Алахьым, Ащ илIыкIо шъуафэIорышI, щынэ шъугу къимыхьаным, шъукIуачIэ къыщымыкIэным пае шъузэмынэкъокъу. ЩэIагъэ зыхэжъугъэлъ: ЩэIагъэ зиIэхэм Алахьыр ягъус!
وَأَطِيعُوا اللَّهَ وَرَسُولَهُ وَلَا تَنَازَعُوا فَتَفْشَلُوا وَتَذْهَبَ رِيحُكُمْ ۖ وَاصْبِرُوا ۚ إِنَّ اللَّهَ مَعَ الصَّابِرِينَ
47
ЦIыфмэ апашъхьэ зыщагъэпагэу, шъорышIыхэу япсэупIэмэ къарыкIыгъэмэ афэдэ шъумыхъу. Алахьым игъогу ахэр дэхых, ау ашIэрэр Алахьым ешIэ.
وَلَا تَكُونُوا كَالَّذِينَ خَرَجُوا مِنْ دِيَارِهِمْ بَطَرًا وَرِئَاءَ النَّاسِ وَيَصُدُّونَ عَنْ سَبِيلِ اللَّهِ ۚ وَاللَّهُ بِمَا يَعْمَلُونَ مُحِيطٌ
48
Мары, ахэмэ яIофхэр дэгъу дэдэхэу шэйтаным аригъэлъэгъуи, ыIуагъ: "ЦIыфмэ ащыщэу зыпари шъо непэ къышъутекIощтэп, сэ сышъуиIэпыIэгъу". ДзитIур къызэлъагъом, ар зэкIэкIожьи, ыIуагъ: "Сэ сиIоф къышъухэлъэп, шъо шъумылъэгъурэр сэ сэлъэгъу. Сэ Алахьым сыщэщынэ, уигъэпщынэнкIэ Алахьыр лъэш!"
وَإِذْ زَيَّنَ لَهُمُ الشَّيْطَانُ أَعْمَالَهُمْ وَقَالَ لَا غَالِبَ لَكُمُ الْيَوْمَ مِنَ النَّاسِ وَإِنِّي جَارٌ لَكُمْ ۖ فَلَمَّا تَرَاءَتِ الْفِئَتَانِ نَكَصَ عَلَىٰ عَقِبَيْهِ وَقَالَ إِنِّي بَرِيءٌ مِنْكُمْ إِنِّي أَرَىٰ مَا لَا تَرَوْنَ إِنِّي أَخَافُ اللَّهَ ۚ وَاللَّهُ شَدِيدُ الْعِقَابِ
49
Мары, нэпитIу зиIэхэми зыгу уз илъхэми аIо: "Ахэр дэзыхьыхыгъэхэр ядин ары". Алахьым щыгугъырэмкIэ Алахьыр лъэш, Iушы!
إِذْ يَقُولُ الْمُنَافِقُونَ وَالَّذِينَ فِي قُلُوبِهِمْ مَرَضٌ غَرَّ هَٰؤُلَاءِ دِينُهُمْ ۗ وَمَنْ يَتَوَكَّلْ عَلَى اللَّهِ فَإِنَّ اللَّهَ عَزِيزٌ حَكِيمٌ
50
Джаурхэр зэрэлIэхэрэр о плъэгъугъэмэ! Ахэмэ анэпашъохэр мэлэIичмэ кIаутыщтыгъэ, акIыбышъохэр раутыщтыгъэ: "ХьэзабкIэ шъутхъэнэу машIом шъупахь!"
وَلَوْ تَرَىٰ إِذْ يَتَوَفَّى الَّذِينَ كَفَرُوا ۙ الْمَلَائِكَةُ يَضْرِبُونَ وُجُوهَهُمْ وَأَدْبَارَهُمْ وَذُوقُوا عَذَابَ الْحَرِيقِ
51
Ар аущтэу зыкIэхъурэр шъуIэмэ ашIагъэр ары. Алахьыр иIумэтхэм зыкIи афэжъалымэп.
ذَٰلِكَ بِمَا قَدَّمَتْ أَيْدِيكُمْ وَأَنَّ اللَّهَ لَيْسَ بِظَلَّامٍ لِلْعَبِيدِ
52
Фирхьаун илъэпкъырэ ахэмэ апэкIэ щыIагъэхэмрэ афэдэу, Алахьым иIэятэ къэгъэшъыпкъагъэхэр щагъэзыягъэх, япсэкIодшIагъэ пае Алахьым ахэр ыгъэпщынагъэх. Сыда пIомэ уигъэпщынэнкIэ Алахьыр лъэш, пхъашэ!
كَدَأْبِ آلِ فِرْعَوْنَ ۙ وَالَّذِينَ مِنْ قَبْلِهِمْ ۚ كَفَرُوا بِآيَاتِ اللَّهِ فَأَخَذَهُمُ اللَّهُ بِذُنُوبِهِمْ ۗ إِنَّ اللَّهَ قَوِيٌّ شَدِيدُ الْعِقَابِ
53
Арэущтэу ар зыкIэхъурэр сыд фэдэ цIыфхэми Алахьым шIоу афишIэрэр, ежьхэм агу илъыр зэбламыхъуфэ, зэблихъурэп, арэущтэу зыкIэхъурэр Алахьым зэхехышъ, ешIэшъ ары.
ذَٰلِكَ بِأَنَّ اللَّهَ لَمْ يَكُ مُغَيِّرًا نِعْمَةً أَنْعَمَهَا عَلَىٰ قَوْمٍ حَتَّىٰ يُغَيِّرُوا مَا بِأَنْفُسِهِمْ ۙ وَأَنَّ اللَّهَ سَمِيعٌ عَلِيمٌ
54
Фирхьаун илъэпкъ, ахэмэ апэкIэ щыIагъэхэм афэдэу, я Тхьэ иIэятэ къэгъэшъыпкъагъэхэр пцIыкIэ ылъытэщтыгъэ. Тэ псэкIодшIэгъабэу яIэм пае ахэр дгъэкIодыгъэх, Фирхьаун илъэпкъ псым чIедгъэхьагъ. Ахэр зэкIэ зэфэнчъэхэу щытыгъэх.
كَدَأْبِ آلِ فِرْعَوْنَ ۙ وَالَّذِينَ مِنْ قَبْلِهِمْ ۚ كَذَّبُوا بِآيَاتِ رَبِّهِمْ فَأَهْلَكْنَاهُمْ بِذُنُوبِهِمْ وَأَغْرَقْنَا آلَ فِرْعَوْنَ ۚ وَكُلٌّ كَانُوا ظَالِمِينَ
55
Шъыпкъэ дэдэмкIэ, Алахьым ыпашъхьэкIэ анахь хьайуан бзаджэхэр шIошъхъуныгъэ шъыпкъэ зимыIагъэхэр арых, ахэмэ шIошъхъуныгъэ шъыпкъэ яIэп.
إِنَّ شَرَّ الدَّوَابِّ عِنْدَ اللَّهِ الَّذِينَ كَفَرُوا فَهُمْ لَا يُؤْمِنُونَ
56
О Iуагъэ зыдэпшIыгъэхэу, етIанэ яIуагъэ ренэу зыукъожьхэрэм, ахэмэ Тхьэм ищынагъо агу илъэп.
الَّذِينَ عَاهَدْتَ مِنْهُمْ ثُمَّ يَنْقُضُونَ عَهْدَهُمْ فِي كُلِّ مَرَّةٍ وَهُمْ لَا يَتَّقُونَ
57
Заом игъом тыдэ ахэмэ уащыIукIагъэми, зэбгырыфых, ахэмэ ауж къакIохэри акъыл ахэлъэу хъунхэкIи мэхъу!
فَإِمَّا تَثْقَفَنَّهُمْ فِي الْحَرْبِ فَشَرِّدْ بِهِمْ مَنْ خَلْفَهُمْ لَعَلَّهُمْ يَذَّكَّرُونَ
58
ЦIыфмэ къумалыгъэ къыбдызэрахьаным утещтыхьэмэ, хьакъым тетэу Iуагъэу адэпшIыгъэр щыгъэзый, къумалхэр Алахьым шIу ылъэгъухэрэп!
وَإِمَّا تَخَافَنَّ مِنْ قَوْمٍ خِيَانَةً فَانْبِذْ إِلَيْهِمْ عَلَىٰ سَوَاءٍ ۚ إِنَّ اللَّهَ لَا يُحِبُّ الْخَائِنِينَ
59
ШIошъхъуныгъэ шъыпкъэ зимыIэхэр Тхьэр зышIошъ хъурэмэ атекIуагъэхэу ерэмыгупшысэх, ахэмэ кIочIаджэ ашIыщтхэп.
وَلَا يَحْسَبَنَّ الَّذِينَ كَفَرُوا سَبَقُوا ۚ إِنَّهُمْ لَا يُعْجِزُونَ
60
Ахэмэ апае шъуфэлъэкIыщтым фэдиз кIуачIи шыудзэ купхэри жъугъэхьазырых, ахэмкIэ Алахьым ипыйхэри, шъо шъуипыйхэри, ахэмэ афэшъхьафэу нэмыкIхэри жъугъэщынэщтых, шъо ахэр шъушIэхэрэп, Алахьым ахэр ешIэх. Алахьым игъогу шъутетэу сыд лIэужыгъо жъугъэкIодыгъэми, зэрэщытэу къышъуIукIэжьыщт, гухэкI шъуиIэщтэп.
وَأَعِدُّوا لَهُمْ مَا اسْتَطَعْتُمْ مِنْ قُوَّةٍ وَمِنْ رِبَاطِ الْخَيْلِ تُرْهِبُونَ بِهِ عَدُوَّ اللَّهِ وَعَدُوَّكُمْ وَآخَرِينَ مِنْ دُونِهِمْ لَا تَعْلَمُونَهُمُ اللَّهُ يَعْلَمُهُمْ ۚ وَمَا تُنْفِقُوا مِنْ شَيْءٍ فِي سَبِيلِ اللَّهِ يُوَفَّ إِلَيْكُمْ وَأَنْتُمْ لَا تُظْلَمُونَ
61
Ахэмэ мамырым зыкъыфащэимэ, ори ащ зыфэщэй, Алахьым щыгугъ: Ащ зэхехы, ешIэ!
وَإِنْ جَنَحُوا لِلسَّلْمِ فَاجْنَحْ لَهَا وَتَوَكَّلْ عَلَى اللَّهِ ۚ إِنَّهُ هُوَ السَّمِيعُ الْعَلِيمُ
62
Ау о ахэмэ уагъэпцIэнэу агу къэкIымэ, о узгъэрэзэщтыр Алахьыр ары, Ащ ежь илъэкIыкIэ ори Тхьэр зышIошъ хъухэрэми кIуачIэ къышъуитыгъ,
وَإِنْ يُرِيدُوا أَنْ يَخْدَعُوكَ فَإِنَّ حَسْبَكَ اللَّهُ ۚ هُوَ الَّذِي أَيَّدَكَ بِنَصْرِهِ وَبِالْمُؤْمِنِينَ
63
Ахэмэ агухэр зэфищагъэх. ЧIыгум телъыр зэкIэ о бгъэкIодыгъэми, ахэмэ агухэр о зэфэпщэнхэ плъэкIыныеп, ау Алахьым ахэмэ агухэр зэфищагъэх, сыда пIомэ Ар лъапIэ, Iуш!
وَأَلَّفَ بَيْنَ قُلُوبِهِمْ ۚ لَوْ أَنْفَقْتَ مَا فِي الْأَرْضِ جَمِيعًا مَا أَلَّفْتَ بَيْنَ قُلُوبِهِمْ وَلَٰكِنَّ اللَّهَ أَلَّفَ بَيْنَهُمْ ۚ إِنَّهُ عَزِيزٌ حَكِيمٌ
64
О пегъэмбар! ОркIэ рэзэныгъэ хъущтыр Алахьыр, Тхьэр зышIошъ хъухэу о къыплъыкIохэрэр арых.
يَا أَيُّهَا النَّبِيُّ حَسْبُكَ اللَّهُ وَمَنِ اتَّبَعَكَ مِنَ الْمُؤْمِنِينَ
65
О пегъэмбар! Тхьэр зышIошъ хъухэрэр зэоным фэгъэчэфых. ЩэIагъэ зиIэу нэбгырэ тIокI къызышъухэкIыкIэ, ахэр шъитIум текIощтых, нэбгыришъэ къызышъухэкIыкIэ, шIошъхъуныгъэ шъыпкъэ зимыIэ минитIум къызэрагурымыIорэм пае атекIощтых.
يَا أَيُّهَا النَّبِيُّ حَرِّضِ الْمُؤْمِنِينَ عَلَى الْقِتَالِ ۚ إِنْ يَكُنْ مِنْكُمْ عِشْرُونَ صَابِرُونَ يَغْلِبُوا مِائَتَيْنِ ۚ وَإِنْ يَكُنْ مِنْكُمْ مِائَةٌ يَغْلِبُوا أَلْفًا مِنَ الَّذِينَ كَفَرُوا بِأَنَّهُمْ قَوْمٌ لَا يَفْقَهُونَ
66
Джы Алахьым псынкIэ къышъуфишIыгъ, мэхагъэ зэрэшъухэлъыр Ащ ешIэ. ЩэIагъэ хэлъэу нэбгыришъэ къышъухэкIымэ, ахэр шъитIум текIощтых, нэбгырэ мин къышъухэкIымэ, Алахьым иIизын хэлъэу, ахэр минитIум текIощтых: щэIагъэ зиIэхэм Алахьыр ягъус!
الْآنَ خَفَّفَ اللَّهُ عَنْكُمْ وَعَلِمَ أَنَّ فِيكُمْ ضَعْفًا ۚ فَإِنْ يَكُنْ مِنْكُمْ مِائَةٌ صَابِرَةٌ يَغْلِبُوا مِائَتَيْنِ ۚ وَإِنْ يَكُنْ مِنْكُمْ أَلْفٌ يَغْلِبُوا أَلْفَيْنِ بِإِذْنِ اللَّهِ ۗ وَاللَّهُ مَعَ الصَّابِرِينَ
67
Пегъэмбар горэми лъэшыгъэ ымыгъотыфэ гъэрхэр ыштэнхэр тефэрэп, ау цIыфхэр гъашIэу зыхэтхэм итхъагъо зэрэфаблэхэрэм, насып шъыпкъэр нэмыкI дунае къызэрэщяжэрэр зэращыгъупшэрэм къыхэкIэу ар ышIэн фаеу мэхъу.
مَا كَانَ لِنَبِيٍّ أَنْ يَكُونَ لَهُ أَسْرَىٰ حَتَّىٰ يُثْخِنَ فِي الْأَرْضِ ۚ تُرِيدُونَ عَرَضَ الدُّنْيَا وَاللَّهُ يُرِيدُ الْآخِرَةَ ۗ وَاللَّهُ عَزِيزٌ حَكِيمٌ
68
Алахьым дэжь къикIэу тхыгъэр пэшIоргъэшъэу къышъуфэмыкIогъагъэмэ, шъуштагъэм пае пщыныжь ин къышъуфехыни.
لَوْلَا كِتَابٌ مِنَ اللَّهِ سَبَقَ لَمَسَّكُمْ فِيمَا أَخَذْتُمْ عَذَابٌ عَظِيمٌ
69
Ащ ыуж къонтхъэу шъуштагъэм щыщэу фит шъузфашIыгъэр, шIоу жъугъотыгъэр шъушхы, Алахьым ищынагъо шъугу ижъугъэлъ. Алахьым къыпфегъэгъу, гукIэгъушI!
فَكُلُوا مِمَّا غَنِمْتُمْ حَلَالًا طَيِّبًا ۚ وَاتَّقُوا اللَّهَ ۚ إِنَّ اللَّهَ غَفُورٌ رَحِيمٌ
70
О пегъэмбар! ШъуIэ илъ гъэрхэм яIу: "Шъо шIу горэ шъугу илъэу Алахьым зишIэкIэ, шъуIахыгъэм нахьышIоу былым къышъуитыщт: Ащ къышъуфилъэгъущт, Алахьым къыпфегъэгъу, гукIэгъушI!
يَا أَيُّهَا النَّبِيُّ قُلْ لِمَنْ فِي أَيْدِيكُمْ مِنَ الْأَسْرَىٰ إِنْ يَعْلَمِ اللَّهُ فِي قُلُوبِكُمْ خَيْرًا يُؤْتِكُمْ خَيْرًا مِمَّا أُخِذَ مِنْكُمْ وَيَغْفِرْ لَكُمْ ۗ وَاللَّهُ غَفُورٌ رَحِيمٌ
71
Ау ыпэкIэ Алахьым ахэр зэрепцIыжьыгъэхэм фэдэу, о уагъэпцIэнэу фаехэ хъумэ, япшIэщтымкIэ Ащ фит уешIы. Алахьым ешIэ, Iуш!
وَإِنْ يُرِيدُوا خِيَانَتَكَ فَقَدْ خَانُوا اللَّهَ مِنْ قَبْلُ فَأَمْكَنَ مِنْهُمْ ۗ وَاللَّهُ عَلِيمٌ حَكِيمٌ
72
Шъыпкъэ дэдэмкIэ, шIошъхъуныгъэ шъыпкъэ зышIыгъэхэр, зихэгъэгу къэзыбгынагъэхэр, имылъкукIи ыпсэкIи Алахьым игъогу фэбэнагъэхэр, шъхьэегъэзыпIэ къязытыгъэхэр, къадеIагъэхэр,ахэр зэпэблагъэх. ШIошъхъуныгъэ шъыпкъэ зышIыгъэхэу зихэгъэгу къэзымыбгынагъэхэм яхэгъэгу къамыбгынэу, зыпари блэгъэныгъэ адышъуиIэп! ДинымкIэ IэпыIэгъу шъуафэхъунэу ахэр къышъолъэIухэмэ, зэзэгъыныгъэ зыдышъуиIэ цIыф лъэпкъым ар пэшIуекIоу щымытмэ, IэпыIэгъу. яшъутыныр къышъутефэ. Шъо шъушIэрэр Алахьым къелъэгъу!
إِنَّ الَّذِينَ آمَنُوا وَهَاجَرُوا وَجَاهَدُوا بِأَمْوَالِهِمْ وَأَنْفُسِهِمْ فِي سَبِيلِ اللَّهِ وَالَّذِينَ آوَوْا وَنَصَرُوا أُولَٰئِكَ بَعْضُهُمْ أَوْلِيَاءُ بَعْضٍ ۚ وَالَّذِينَ آمَنُوا وَلَمْ يُهَاجِرُوا مَا لَكُمْ مِنْ وَلَايَتِهِمْ مِنْ شَيْءٍ حَتَّىٰ يُهَاجِرُوا ۚ وَإِنِ اسْتَنْصَرُوكُمْ فِي الدِّينِ فَعَلَيْكُمُ النَّصْرُ إِلَّا عَلَىٰ قَوْمٍ بَيْنَكُمْ وَبَيْنَهُمْ مِيثَاقٌ ۗ وَاللَّهُ بِمَا تَعْمَلُونَ بَصِيرٌ
73
Джаурмэ ащыщхэр зым адырэр икIэнзехьэ мэхъух. Шъо аущтэу шъумызекIомэ, чIыгум хабзэ темылъыжьэу зэщыкъоныгъэ инхэр фэхъущтых
وَالَّذِينَ كَفَرُوا بَعْضُهُمْ أَوْلِيَاءُ بَعْضٍ ۚ إِلَّا تَفْعَلُوهُ تَكُنْ فِتْنَةٌ فِي الْأَرْضِ وَفَسَادٌ كَبِيرٌ
74
ШIошъхъуныгъэ шъыпкъэ зышIыгъэхэр, яхэгъэгу къэзыбгынагъэхэр, Алахьым игъогу тетхэу бэнагъэхэр, ахэмэ шъхьэегъэзыпIэ къязытыгъэхэр, IэпыIэгъу къафэхъугъэхэр, ахэмэ Тхьэр ашIошъ мэхъу, ахэмэ къафегъэгъу, гъашIэм зыщыфэныкъохэр хьалэлэу къараты.
وَالَّذِينَ آمَنُوا وَهَاجَرُوا وَجَاهَدُوا فِي سَبِيلِ اللَّهِ وَالَّذِينَ آوَوْا وَنَصَرُوا أُولَٰئِكَ هُمُ الْمُؤْمِنُونَ حَقًّا ۚ لَهُمْ مَغْفِرَةٌ وَرِزْقٌ كَرِيمٌ
75
Нэужым шIошъхъуныгъэ шъыпкъэ зышIыгъэхэр, яхэгъэгу къэзыбгынагъэхэр, шъуигъусэхэу диным пае бэнагъэхэр, ахэр шъо шъущыщых, ау Алахьым итхыгъэ зэритымкIэ, зэIахьылхэр нахь зэпэблагъэх. Алахьым ыIэ къимыхьан щыIэп!.
وَالَّذِينَ آمَنُوا مِنْ بَعْدُ وَهَاجَرُوا وَجَاهَدُوا مَعَكُمْ فَأُولَٰئِكَ مِنْكُمْ ۚ وَأُولُو الْأَرْحَامِ بَعْضُهُمْ أَوْلَىٰ بِبَعْضٍ فِي كِتَابِ اللَّهِ ۗ إِنَّ اللَّهَ بِكُلِّ شَيْءٍ عَلِيمٌ