1
Уашъом щыIи чIыгум щыIи зыIэ илъэу Алахьым щытхъур ыдэжь. КъэкIощт гъашIэми Ащ щытхъур ыдэжь. Ар Iуш, ешIэ!
بِسْمِ اللَّهِ الرَّحْمَٰنِ الرَّحِيمِ الْحَمْدُ لِلَّهِ الَّذِي لَهُ مَا فِي السَّمَاوَاتِ وَمَا فِي الْأَرْضِ وَلَهُ الْحَمْدُ فِي الْآخِرَةِ ۚ وَهُوَ الْحَكِيمُ الْخَبِيرُ
2
ЧIыгум хахьэри ащ къыхэкIри, уашъом къехри ащ дэкIуаери Ащ ешIэ. Ар гукIэгъушI, къыпфегъэгъу!
يَعْلَمُ مَا يَلِجُ فِي الْأَرْضِ وَمَا يَخْرُجُ مِنْهَا وَمَا يَنْزِلُ مِنَ السَّمَاءِ وَمَا يَعْرُجُ فِيهَا ۚ وَهُوَ الرَّحِيمُ الْغَفُورُ
3
ШIошъхъуныгъэ шъыпкъэ зимыIагъэхэм аIо: "Тэ аджалыр къытфэкIощтэп!" ЯIу: "Си Тхьэу шъэфыр зышIэрэмкIэ тхьэ сэIо, ар шъо къышъуфэкIощт", уашъоми чIыгуми сэпацэм фэдиз Ащ шъэфы ащыфэхъущтэп, зэхэугуфыкIыгъэ тхылъым имытэу, ащ нахь цIыкIуи нахь ини щыIэп.
وَقَالَ الَّذِينَ كَفَرُوا لَا تَأْتِينَا السَّاعَةُ ۖ قُلْ بَلَىٰ وَرَبِّي لَتَأْتِيَنَّكُمْ عَالِمِ الْغَيْبِ ۖ لَا يَعْزُبُ عَنْهُ مِثْقَالُ ذَرَّةٍ فِي السَّمَاوَاتِ وَلَا فِي الْأَرْضِ وَلَا أَصْغَرُ مِنْ ذَٰلِكَ وَلَا أَكْبَرُ إِلَّا فِي كِتَابٍ مُبِينٍ
4
ШIошъхъуныгъэ шъыпкъэ зышIыгъэхэм, шIу зышIэщтыгъэхэм Ащ тын къафишIызэ, къафегъэгъу, хьалэл Iахь къареты.
لِيَجْزِيَ الَّذِينَ آمَنُوا وَعَمِلُوا الصَّالِحَاتِ ۚ أُولَٰئِكَ لَهُمْ مَغْفِرَةٌ وَرِزْقٌ كَرِيمٌ
5
Тэ тиIэятэ къэгъэшъыпкъэжьыгъэхэм акIуачIэ къыщагъэкIэным пае егугъухэрэмэ, гугъу уезгъахьырэмэ хьазаб пщынэжь афыщылъ.
وَالَّذِينَ سَعَوْا فِي آيَاتِنَا مُعَاجِزِينَ أُولَٰئِكَ لَهُمْ عَذَابٌ مِنْ رِجْزٍ أَلِيمٌ
6
ШIэныгъэ къызэратыгъэхэм алъэгъу о уи Тхьэ дэжь къикIэу къыпфырагъэхыгъэр шъыпкъэу зэрэщытыр, щытхъушхо зыпылъым игъогу ин дэдэу узэрэфищэрэр.
وَيَرَى الَّذِينَ أُوتُوا الْعِلْمَ الَّذِي أُنْزِلَ إِلَيْكَ مِنْ رَبِّكَ هُوَ الْحَقَّ وَيَهْدِي إِلَىٰ صِرَاطِ الْعَزِيزِ الْحَمِيدِ
7
ШIошъхъуныгъэ шъыпкъэ зымышIыгъэхэм аIо: "Зыпари къышъухэмынэжьэу шъузыкIодыпэкIэ, икIэрыкIэу шъукъэхъужьынэу къышъозыIорэ цIыфыр къышъотэрэгъэлъэгъуа?
وَقَالَ الَّذِينَ كَفَرُوا هَلْ نَدُلُّكُمْ عَلَىٰ رَجُلٍ يُنَبِّئُكُمْ إِذَا مُزِّقْتُمْ كُلَّ مُمَزَّقٍ إِنَّكُمْ لَفِي خَلْقٍ جَدِيدٍ
8
Алахьым ащ имыхьакъ тырелъхьа е ышъэ икIыгъа?" Ахърэт гъашIэм шIошъхъуныгъэ фызимыIэхэр хьазаб хэтых, гъунэм нэсэу гъощагъэх!
أَفْتَرَىٰ عَلَى اللَّهِ كَذِبًا أَمْ بِهِ جِنَّةٌ ۗ بَلِ الَّذِينَ لَا يُؤْمِنُونَ بِالْآخِرَةِ فِي الْعَذَابِ وَالضَّلَالِ الْبَعِيدِ
9
Е ахэмэ апэкIэ щыIэри, аужкIэ щыIэри, уашъом, чIыгум ащыIэри сыда зыкIэмылъэгъурэр? Тэ тыфае хъумэ, ахэр чIыгум едгъэдырынхэ тлъэкIын е къутафэхэр уашъом къедгъэфэхыни, къатедгъэфэн. Шъыпкъэ дэдэмкIэ, Тхьэм иIумэтэу, кIэгъожьыгъэу Ащ хэтми зыфэзгъазэрэмкIэ ар щысэтехыпIэу щыт.
أَفَلَمْ يَرَوْا إِلَىٰ مَا بَيْنَ أَيْدِيهِمْ وَمَا خَلْفَهُمْ مِنَ السَّمَاءِ وَالْأَرْضِ ۚ إِنْ نَشَأْ نَخْسِفْ بِهِمُ الْأَرْضَ أَوْ نُسْقِطْ عَلَيْهِمْ كِسَفًا مِنَ السَّمَاءِ ۚ إِنَّ فِي ذَٰلِكَ لَآيَةً لِكُلِّ عَبْدٍ مُنِيبٍ
10
Зэгорэм Тэ Даутэ фэхъугъэ иIэу тшIыгъэ: "Къушъхьэхэри бзыухэри, ащ шъуригъусэу Сэ сищытхъу шъуIо!" Тэ ащ гъучIыр нахь шъабэ фэтшIыгъ:
وَلَقَدْ آتَيْنَا دَاوُودَ مِنَّا فَضْلًا ۖ يَا جِبَالُ أَوِّبِي مَعَهُ وَالطَّيْرَ ۖ وَأَلَنَّا لَهُ الْحَدِيدَ
11
"Ашъо джанэхэр шIы, хъурджанэхэр ащ щызэрэзэпыпшIэхэрэр зэпэщэч, шIу шъушIэ, шъо шъушIэрэр Сэ къэсэлъэгъу!"
أَنِ اعْمَلْ سَابِغَاتٍ وَقَدِّرْ فِي السَّرْدِ ۖ وَاعْمَلُوا صَالِحًا ۖ إِنِّي بِمَا تَعْمَلُونَ بَصِيرٌ
12
Сулейман жьыбгъэр фэдгъэIорышIагъ, ащ ипчэдыжь гъогу мазэ, ащ ипчыхьэ гъогу мазэ. Гъоплъэ ткIугъэр псынэкIэчъэу къыфыкIэчъынэу Тэ тшIыгъэ. Ащ и Тхьэ иунашъокIэ джынэмэ ащыщхэм ащ ыпашъхьэ Iоф щашIэ, ахэмэ ащыщэу Тэ тиунашъо зыщызыдзыерэм машIокIэ пщынэжь зэхишIэнэу Тэ еттыщт.
وَلِسُلَيْمَانَ الرِّيحَ غُدُوُّهَا شَهْرٌ وَرَوَاحُهَا شَهْرٌ ۖ وَأَسَلْنَا لَهُ عَيْنَ الْقِطْرِ ۖ وَمِنَ الْجِنِّ مَنْ يَعْمَلُ بَيْنَ يَدَيْهِ بِإِذْنِ رَبِّهِ ۖ وَمَنْ يَزِغْ مِنْهُمْ عَنْ أَمْرِنَا نُذِقْهُ مِنْ عَذَابِ السَّعِيرِ
13
Ар зыфаер ахэмэ фашIыщтыгъэ: Унэ зэхэтхэр, мыжъо сурэтхэр, псыубытIыпIэм фэдэ Iэгубжъэ инхэр, къушъхьэмэ афэдэу щыт щыуанхэр. Даутэ илъэпкъ, рэзэныгъэ шъушIы! Ау сэ сиIумэтмэ ащыщ мыбэмэ рэзэныгъэ ахэлъ!
يَعْمَلُونَ لَهُ مَا يَشَاءُ مِنْ مَحَارِيبَ وَتَمَاثِيلَ وَجِفَانٍ كَالْجَوَابِ وَقُدُورٍ رَاسِيَاتٍ ۚ اعْمَلُوا آلَ دَاوُودَ شُكْرًا ۚ وَقَلِيلٌ مِنْ عِبَادِيَ الشَّكُورُ
14
ЛIэныгъэр Тэ ащ зытетэлъхьэм, илIэныгъэ къэзгъэлъэгъуагъэр ибэщыпэ пызыхъукIыгъэ чIылъэ хьэцIэ=пIацIэр ары ныIэп: Ар зытефэм, зэрэлIагъэр джынэмэ нафэ къафэхъугъ. А шъэфыр нахь пасэу ахэмэ ашIэгъагъэмэ, зыгъэпыутхэрэ Iофым къыIунэнхэеп.
فَلَمَّا قَضَيْنَا عَلَيْهِ الْمَوْتَ مَا دَلَّهُمْ عَلَىٰ مَوْتِهِ إِلَّا دَابَّةُ الْأَرْضِ تَأْكُلُ مِنْسَأَتَهُ ۖ فَلَمَّا خَرَّ تَبَيَّنَتِ الْجِنُّ أَنْ لَوْ كَانُوا يَعْلَمُونَ الْغَيْبَ مَا لَبِثُوا فِي الْعَذَابِ الْمُهِينِ
15
СэбэI щыпсэухэрэм япсэупIэхэр зэгорэм щысэтехыпIэхэу щытыгъэх, джабгъумкIи сэмэгумкIи хэтэ гъэкIэрэкIэгъитIу яIагъ, шъуи Тхьэ къышъуитыгъэм щыщ шъушхы, Ащ чылэшIу къызэрэшъуитыгъэмкIэ, Тхьэ гукIэгъушIэ зэрэшъуиIэмкIэ шыкур фэшъушI.
لَقَدْ كَانَ لِسَبَإٍ فِي مَسْكَنِهِمْ آيَةٌ ۖ جَنَّتَانِ عَنْ يَمِينٍ وَشِمَالٍ ۖ كُلُوا مِنْ رِزْقِ رَبِّكُمْ وَاشْكُرُوا لَهُ ۚ بَلْدَةٌ طَيِّبَةٌ وَرَبٌّ غَفُورٌ
16
Ау ахэр зыдэхыхэм, Iэрим псыхъо къиугъэр ахэмэ афэдгъэкIуагъ, ахэмэ яхэтитIу пхъэшъхьэ мышъхьэ дыджхэр къызпыкIэхэрэ хэтитIукIэ, псыгуIэнэ жъгъэйхэмкIэ зэблэтхъугъ.
فَأَعْرَضُوا فَأَرْسَلْنَا عَلَيْهِمْ سَيْلَ الْعَرِمِ وَبَدَّلْنَاهُمْ بِجَنَّتَيْهِمْ جَنَّتَيْنِ ذَوَاتَيْ أُكُلٍ خَمْطٍ وَأَثْلٍ وَشَيْءٍ مِنْ سِدْرٍ قَلِيلٍ
17
ШIошъхъуныгъэ зэрямыIагъэм пае Тэ ахэмэ джаущтэу тятагъ! Джаурхэр ары ныIэп Тэ джаущтэу тызатэрэр!
ذَٰلِكَ جَزَيْنَاهُمْ بِمَا كَفَرُوا ۖ وَهَلْ نُجَازِي إِلَّا الْكَفُورَ
18
Ахэмэ азфагу яморад къадэхъунэу Тэ тшIыгъэ, къуаджэмэ азфагу Тэ къоджэ шIагъохэр къыдэдгъэтэджагъэх, гъогу афэтшIыгъ: "Щынагъо шъухэмытэу ащ чэщыкIи мафэкIи шъущызекIу!"
وَجَعَلْنَا بَيْنَهُمْ وَبَيْنَ الْقُرَى الَّتِي بَارَكْنَا فِيهَا قُرًى ظَاهِرَةً وَقَدَّرْنَا فِيهَا السَّيْرَ ۖ سِيرُوا فِيهَا لَيَالِيَ وَأَيَّامًا آمِنِينَ
19
Ахэмэ аIуагъ: "Ярэби я Алахь, тэ тызщызекIорэм гъогоу илъыр нахь ин къытфэшI! ахэмэ шъхьакIо зэрахыжьыгъ. Ахэр Тэ къэбар тшIыгъэх, Тэ ахэр хэгъэгу зэфэшъхьафхэм арыттакъохи, иттэкъухьагъэх. Хэтми щэIагъэ зиIэмкIэ, разэмкIэ ар щысэтехыпIэу щыт!
فَقَالُوا رَبَّنَا بَاعِدْ بَيْنَ أَسْفَارِنَا وَظَلَمُوا أَنْفُسَهُمْ فَجَعَلْنَاهُمْ أَحَادِيثَ وَمَزَّقْنَاهُمْ كُلَّ مُمَزَّقٍ ۚ إِنَّ فِي ذَٰلِكَ لَآيَاتٍ لِكُلِّ صَبَّارٍ شَكُورٍ
20
Иблыс игупшысэ шъыпкъэкIэ ахэмэ аригъэштагъ, ахэр, Алахьыр зышIошъ хъурэ мыбэмэ афэшъхьаф, ащ ыуж рыкIуагъэх.
وَلَقَدْ صَدَّقَ عَلَيْهِمْ إِبْلِيسُ ظَنَّهُ فَاتَّبَعُوهُ إِلَّا فَرِيقًا مِنَ الْمُؤْمِنِينَ
21
Ахэмэ ащ лъэкI зыкIафыриIэгъэ закъор ахърэт гъашIэм шIошъхъуныгъэ фызиIэхэр ащ ахэтшIыкIынхэм пай. Уи Тхьэ сыд фэдэри къеухъумэ!
وَمَا كَانَ لَهُ عَلَيْهِمْ مِنْ سُلْطَانٍ إِلَّا لِنَعْلَمَ مَنْ يُؤْمِنُ بِالْآخِرَةِ مِمَّنْ هُوَ مِنْهَا فِي شَكٍّ ۗ وَرَبُّكَ عَلَىٰ كُلِّ شَيْءٍ حَفِيظٌ
22
ЯIу: "Алахьым фэшъхьафэу шъо къэшъуугупшысыгъэмэ шъуялъэIу! Уашъоми чIыгуми сэпацэм ыщэчырэм фэдиз ахэмэ лъэкI ащыряIэп, ахэмэ ягъэпсын Алахьым игъусэхэу ахэр хэлэжьагъэхэп, Ащ IэпыIэгъу фэхъун ахэмэ ахэтэп.
قُلِ ادْعُوا الَّذِينَ زَعَمْتُمْ مِنْ دُونِ اللَّهِ ۖ لَا يَمْلِكُونَ مِثْقَالَ ذَرَّةٍ فِي السَّمَاوَاتِ وَلَا فِي الْأَرْضِ وَمَا لَهُمْ فِيهِمَا مِنْ شِرْكٍ وَمَا لَهُ مِنْهُمْ مِنْ ظَهِيرٍ
23
Ащ фит ышIыхэрэм афэшъхьаф, Ащ ыпашъхьэ гъусагъэм ишIуагъэ къыщыкIощтэп. Ахэмэ агу щынагъор зикIыжькIэ, ахэмэ аIощт: "Шъуи Тхьэ сыд ыIуагъэр?" Адырэмэ аIощт: "Шъыпкъэр ары, Ар лъагэ, ин дэд!"
وَلَا تَنْفَعُ الشَّفَاعَةُ عِنْدَهُ إِلَّا لِمَنْ أَذِنَ لَهُ ۚ حَتَّىٰ إِذَا فُزِّعَ عَنْ قُلُوبِهِمْ قَالُوا مَاذَا قَالَ رَبُّكُمْ ۖ قَالُوا الْحَقَّ ۖ وَهُوَ الْعَلِيُّ الْكَبِيرُ
24
ЯIу: "Шъузфаер уашъоми чIыгуми къахэкIэу хэта шъозгъэгъотрэр?" ЯIу: "Алахьыр ары". Шъыпкъэ дэдэмкIэ, тэри шъори е гъогу занкIэм тытет, е гъэнэфагъэу тыгъощагъ!
قُلْ مَنْ يَرْزُقُكُمْ مِنَ السَّمَاوَاتِ وَالْأَرْضِ ۖ قُلِ اللَّهُ ۖ وَإِنَّا أَوْ إِيَّاكُمْ لَعَلَىٰ هُدًى أَوْ فِي ضَلَالٍ مُبِينٍ
25
ЯIу: "Тэ псэкIодшIагъэу тиIэхэмкIэ шъо къышъоупчIыщтхэп, шъо шъушIэрэмкIэ тэри къытэупчIыщтхэп".
قُلْ لَا تُسْأَلُونَ عَمَّا أَجْرَمْنَا وَلَا نُسْأَلُ عَمَّا تَعْمَلُونَ
26
ЯIу: "Тэ ти Тхьэ тызэIуигъэкIэжьыщт, етIанэ хьакъым тетэу тыкъызэхифыщт. Ащ хэшIыкIышхо фыриIэу Iофыр зэхефы, ешIэ!"
قُلْ يَجْمَعُ بَيْنَنَا رَبُّنَا ثُمَّ يَفْتَحُ بَيْنَنَا بِالْحَقِّ وَهُوَ الْفَتَّاحُ الْعَلِيمُ
27
ЯIу: "Ащ гожъугъэуцуагъэхэр сэ къысэжъугъэлъэгъух!" Ахэр щыIэхэп: а зыр ары ныIэп Алахьэ лъэшэу, Iушэу щыIэр!
قُلْ أَرُونِيَ الَّذِينَ أَلْحَقْتُمْ بِهِ شُرَكَاءَ ۖ كَلَّا ۚ بَلْ هُوَ اللَّهُ الْعَزِيزُ الْحَكِيمُ
28
ЗэкIэ цIыфхэм мэкъэгъэIоу, гъэдэIокIо ушъыякIоу Тэ уафэдгъэкIуагъ ныIэп, ау ахэмэ анахьыбэ цIыфмэ ар ашIэрэп.
وَمَا أَرْسَلْنَاكَ إِلَّا كَافَّةً لِلنَّاسِ بَشِيرًا وَنَذِيرًا وَلَٰكِنَّ أَكْثَرَ النَّاسِ لَا يَعْلَمُونَ
29
Ахэмэ аIо: "Шъо шъыпкъэ къэшъоIомэ, а тыкъызэрэжъугъэгугъагъэр сыдигъуа къызыхъущтыр?"
وَيَقُولُونَ مَتَىٰ هَٰذَا الْوَعْدُ إِنْ كُنْتُمْ صَادِقِينَ
30
ЯIу: "Шъощ пае сыхьатыр гъэнэфэгъахэ: шъо ар зы сыхьаткIи жъугъэпсынкIэни лъыжъугъэкIотэни шъулъэкIыщтэп.
قُلْ لَكُمْ مِيعَادُ يَوْمٍ لَا تَسْتَأْخِرُونَ عَنْهُ سَاعَةً وَلَا تَسْتَقْدِمُونَ
31
ШIошъхъуныгъэ зимыIагъэхэм аIуагъ: "Мы КъурIаными ащ ыпэкIэ къырагъэхыгъэми шIошъхъуныгъэ шъыпкъэ фэтшIыщтэп!" Шъыпкъагъэ зимыIэхэр я Тхьэ ыпашъхьэ рагъэуцуагъэхэу о плъэгъугъэмэ! Ахэмэ гущыIэхэр зэтыралъхьажьхэу, зэрэгъэмысэжьхэу рагъажьэ. Хъыбэеу щытыгъэхэм зыхэзыIэтыкIыщтыгъэхэм араIо: "Шъоры мыхъугъэмэ, тэ диныр тшIошъ хъоу тыщытыщтыгъэ!"
وَقَالَ الَّذِينَ كَفَرُوا لَنْ نُؤْمِنَ بِهَٰذَا الْقُرْآنِ وَلَا بِالَّذِي بَيْنَ يَدَيْهِ ۗ وَلَوْ تَرَىٰ إِذِ الظَّالِمُونَ مَوْقُوفُونَ عِنْدَ رَبِّهِمْ يَرْجِعُ بَعْضُهُمْ إِلَىٰ بَعْضٍ الْقَوْلَ يَقُولُ الَّذِينَ اسْتُضْعِفُوا لِلَّذِينَ اسْتَكْبَرُوا لَوْلَا أَنْتُمْ لَكُنَّا مُؤْمِنِينَ
32
ЗыхэзыIэтыкIыщтыгъэхэм хъыбэеу щытыгъэхэм араIо: "Гъогу занкIэр къызышъуфэкIогъахэм ыуж, тэ ащ шъудэдгъэхыгъа? Хьау, шъо псэкIодышIэхэу шъущытыгъ!"
قَالَ الَّذِينَ اسْتَكْبَرُوا لِلَّذِينَ اسْتُضْعِفُوا أَنَحْنُ صَدَدْنَاكُمْ عَنِ الْهُدَىٰ بَعْدَ إِذْ جَاءَكُمْ ۖ بَلْ كُنْتُمْ مُجْرِمِينَ
33
Хъыбэеу щытыгъэхэм зыхэзыIэтыкIыщтыгъэхэм араIуагъ: "Ары! Чэщыми мафэми тхьагъэпцIыгъэу ахэлъыгъэр Алахьыр тэ тшIошъ мыхъунэу, Ащ яхьщырхэр тшIынхэу шъо унашъо къызэрэтфэшъушIыщтыгъэр ары!" Хьазабыр залъэгъукIэ, ахэмэ джаущтэу зэрэкIэгъожьхэрэр къагъэлъэгъощт. Джаурмэ апшъэ Тэ пшъэхъухэр арытлъхьащт, ащ фэдэ тын ахэмэ зыкIаратыщтыр ашIагъэм паеба?
وَقَالَ الَّذِينَ اسْتُضْعِفُوا لِلَّذِينَ اسْتَكْبَرُوا بَلْ مَكْرُ اللَّيْلِ وَالنَّهَارِ إِذْ تَأْمُرُونَنَا أَنْ نَكْفُرَ بِاللَّهِ وَنَجْعَلَ لَهُ أَنْدَادًا ۚ وَأَسَرُّوا النَّدَامَةَ لَمَّا رَأَوُا الْعَذَابَ وَجَعَلْنَا الْأَغْلَالَ فِي أَعْنَاقِ الَّذِينَ كَفَرُوا ۚ هَلْ يُجْزَوْنَ إِلَّا مَا كَانُوا يَعْمَلُونَ
34
Сыд фэдэ ушъыекIо гъэдэIуакIо сыд фэдэ къуаджэ дгъэкIуагъэми, насып щыIакIэм зэригъэкIокIыгъэхэу ахэмэ адэсхэм аIощтыгъэ: "Шъо шъукъызфагъэкIуагъэр тэ тшIошъ хъурэп!"
وَمَا أَرْسَلْنَا فِي قَرْيَةٍ مِنْ نَذِيرٍ إِلَّا قَالَ مُتْرَفُوهَا إِنَّا بِمَا أُرْسِلْتُمْ بِهِ كَافِرُونَ
35
Ахэмэ аIуагъ: "Тэ мылъкукIи кIалэхэмкIи тыбай. Пщынэныр зифэшъуашэхэм тащыщэп".
وَقَالُوا نَحْنُ أَكْثَرُ أَمْوَالًا وَأَوْلَادًا وَمَا نَحْنُ بِمُعَذَّبِينَ
36
ЯIу: "Шъыпкъэ дэдэмкIэ, сэ си Тхьэ зыфаем ищыкIагъэр е къелыекIэу къыреты, е фикъущтым фэдизэу, ау цIыфмэ ащыщыбэмэ ар ашIэрэп.
قُلْ إِنَّ رَبِّي يَبْسُطُ الرِّزْقَ لِمَنْ يَشَاءُ وَيَقْدِرُ وَلَٰكِنَّ أَكْثَرَ النَّاسِ لَا يَعْلَمُونَ
37
Шъо шъуимылъкуи шъо шъуикIалэхэри Сэ шъо благъэ зыкъызэрэсфэшъушIырэм ишIогъэ лъапсэхэп: шIошъхъуныгъэ шъыпкъэ зышIыгъэхэр, шIу зышIэщтыгъэхэр арых ныIэп яшIушIагъэ пае фэдитIу тын зыгъотыщтхэр, унэ хэхыгъэмэ ахэр ащыгупсэфыщтых.
وَمَا أَمْوَالُكُمْ وَلَا أَوْلَادُكُمْ بِالَّتِي تُقَرِّبُكُمْ عِنْدَنَا زُلْفَىٰ إِلَّا مَنْ آمَنَ وَعَمِلَ صَالِحًا فَأُولَٰئِكَ لَهُمْ جَزَاءُ الضِّعْفِ بِمَا عَمِلُوا وَهُمْ فِي الْغُرُفَاتِ آمِنُونَ
38
Тэ тиIэятэ къэгъэшъыпкъэжьыгъэхэр хъыбэй ашIынхэм пае егугъыхэрэр зэпымыоу хьазаб хэтыщтых.
وَالَّذِينَ يَسْعَوْنَ فِي آيَاتِنَا مُعَاجِزِينَ أُولَٰئِكَ فِي الْعَذَابِ مُحْضَرُونَ
39
ЯIу: "Шъыпкъэ дэдэмкIэ, Ежь иIумэтхэм ащыщхэу зыфаем сэ си Тхьэ къелыекIэу ищыкIагъэр е фикъущтым фэдиз къыреты. Шъо шъутырэм фэдиз Ащ шъуигъэгъотыжьыщт, уищыкIагъэр озгъэгъотрэмэ Ар анахьышIу!
قُلْ إِنَّ رَبِّي يَبْسُطُ الرِّزْقَ لِمَنْ يَشَاءُ مِنْ عِبَادِهِ وَيَقْدِرُ لَهُ ۚ وَمَا أَنْفَقْتُمْ مِنْ شَيْءٍ فَهُوَ يُخْلِفُهُ ۖ وَهُوَ خَيْرُ الرَّازِقِينَ
40
А мафэм ахэр зэкIэ Ащ ыугъоижьыщтых, етIанэ мэлаIичмэ ариIощт: "Мыхэмэ шъхьащэ къышъуфашIыщтыгъа?"
وَيَوْمَ يَحْشُرُهُمْ جَمِيعًا ثُمَّ يَقُولُ لِلْمَلَائِكَةِ أَهَٰؤُلَاءِ إِيَّاكُمْ كَانُوا يَعْبُدُونَ
41
Ахэмэ аIощт: "О щытхъур уадэжь! Ахэр арэп, Оры къыткъотыр! Ары, ахэмэ джынэмэ шъхьащэ афашIыщтыгъэ, ахэмэ анахьыбэм джынэмэ шIошъхъуныгъэ афыряIагъ!"
قَالُوا سُبْحَانَكَ أَنْتَ وَلِيُّنَا مِنْ دُونِهِمْ ۖ بَلْ كَانُوا يَعْبُدُونَ الْجِنَّ ۖ أَكْثَرُهُمْ بِهِمْ مُؤْمِنُونَ
42
А мафэм зымэ адырэхэр федэ е зэрар афэхъунхэу амал яIэп. Мызафэу щытыгъэхэм Тэ ятIощт: "Шъо пцIыкIэ шъулъытэщтыгъэ мэшIо пщынэжьыр зэхашъушIэ!"
فَالْيَوْمَ لَا يَمْلِكُ بَعْضُكُمْ لِبَعْضٍ نَفْعًا وَلَا ضَرًّا وَنَقُولُ لِلَّذِينَ ظَلَمُوا ذُوقُوا عَذَابَ النَّارِ الَّتِي كُنْتُمْ بِهَا تُكَذِّبُونَ
43
Тэ тиIэятэ къэгъэшъыпкъэжьыгъэхэм зэхэугуфыкIыгъэу ахэмэ къафяджэхэ зыхъукIэ, аIо: "Ар цIыфы ныIэп, шъуятэхэм шъхьащэ зыфашIыщтыгъэхэм шъуадигъэхы ащ шIоигъу!", ахэмэ аIощтыгъэ: "Ар (КъурIаныр) пцIэу къэугупшысыгъэ ныIэп!" Шъыпкъэр къызафакIом, шIошъхъуныгъэ зимыIагъэхэм аIо: "Ар шхъухьэ гъэнэфагъ ныIэп!"
وَإِذَا تُتْلَىٰ عَلَيْهِمْ آيَاتُنَا بَيِّنَاتٍ قَالُوا مَا هَٰذَا إِلَّا رَجُلٌ يُرِيدُ أَنْ يَصُدَّكُمْ عَمَّا كَانَ يَعْبُدُ آبَاؤُكُمْ وَقَالُوا مَا هَٰذَا إِلَّا إِفْكٌ مُفْتَرًى ۚ وَقَالَ الَّذِينَ كَفَرُوا لِلْحَقِّ لَمَّا جَاءَهُمْ إِنْ هَٰذَا إِلَّا سِحْرٌ مُبِينٌ
44
Ахэмэ зэрагъэшIэн тхылъ Тэ яттыгъагъэп, уапэкIи гъэдэIокIо=ушъыякIуи афэдгъэкIогъагъэп.
وَمَا آتَيْنَاهُمْ مِنْ كُتُبٍ يَدْرُسُونَهَا ۖ وَمَا أَرْسَلْنَا إِلَيْهِمْ قَبْلَكَ مِنْ نَذِيرٍ
45
Ахэмэ апэкIэ щыIагъэхэм пцIыр ашIошъ хъущтыгъэ, Тэ ахэмэ мыдырэмэ (Мыхьамэт дэпсэухэрэм) афэтшIагъэм ызыпшIани яттыгъэп, ахэмэ Тэ тилIыкIохэр пцIыусхэкIэ алъытэщтыгъэх. Сэ сигубж лъэш зыфэдагъэр!
وَكَذَّبَ الَّذِينَ مِنْ قَبْلِهِمْ وَمَا بَلَغُوا مِعْشَارَ مَا آتَيْنَاهُمْ فَكَذَّبُوا رُسُلِي ۖ فَكَيْفَ كَانَ نَكِيرِ
46
ЯIу: "Сэ зы ушъый закъо къышъостыщт. ТIырытIоуи зырызэуи Алахьым ыпашъхьэ шъуихь, етIанэ шъуегупшыс, джащыгъум шъо къыжъугурыIощт шъо шъущыщ цIыфыр ышъэ зэримыкIыгъэр, пщынэжь лъэшым шъущызыухъумэрэ гъэдэIокIо=ушъыякIоу зэрэщытыр!"
قُلْ إِنَّمَا أَعِظُكُمْ بِوَاحِدَةٍ ۖ أَنْ تَقُومُوا لِلَّهِ مَثْنَىٰ وَفُرَادَىٰ ثُمَّ تَتَفَكَّرُوا ۚ مَا بِصَاحِبِكُمْ مِنْ جِنَّةٍ ۚ إِنْ هُوَ إِلَّا نَذِيرٌ لَكُمْ بَيْنَ يَدَيْ عَذَابٍ شَدِيدٍ
47
ЯIу: "Сэ тын къысфэшъушIынэу сышъолъэIурэп. Ар шъощ пай. Алахьым иIэм фэшъхьаф сэщ пае тын щыIэп: Сыд фэдэрэ Iофи Ар ишыхьат!"
قُلْ مَا سَأَلْتُكُمْ مِنْ أَجْرٍ فَهُوَ لَكُمْ ۖ إِنْ أَجْرِيَ إِلَّا عَلَى اللَّهِ ۖ وَهُوَ عَلَىٰ كُلِّ شَيْءٍ شَهِيدٌ
48
ЯIу: "Шъыпкъэ дэдэмкIэ, сэ си Тхьэ шъыпкъэр къеты. Ащ гум ишъэфхэр ешIэ!"
قُلْ إِنَّ رَبِّي يَقْذِفُ بِالْحَقِّ عَلَّامُ الْغُيُوبِ
49
ЯIу: "Шъыпкъэр къэкIуагъ, пцIыр къэкIожьыщтэп, къыгъэзэжьыщтэп!"
قُلْ جَاءَ الْحَقُّ وَمَا يُبْدِئُ الْبَاطِلُ وَمَا يُعِيدُ
50
ЯIу: "Сэ сыгъощагъэмэ, зэрар зэсхыжьэу сэгъуащэ, ау гъогу занкIэм сырэкIомэ, сызыкIырыкIорэр си Тхьэ сшIошъ ыгъэхъугъэшъ ары. Шъыпкъэ дэдэмкIэ, Ащ зэхехы, къытпэблагъ".
قُلْ إِنْ ضَلَلْتُ فَإِنَّمَا أَضِلُّ عَلَىٰ نَفْسِي ۖ وَإِنِ اهْتَدَيْتُ فَبِمَا يُوحِي إِلَيَّ رَبِّي ۚ إِنَّهُ سَمِيعٌ قَرِيبٌ
51
КIаIэжьынэу амал ямыIэжь зыхъухэкIэ, чIыпIэ благъэм щыубытыгъэхэ зыхъукIэ, ахэмэ агучIэ зэризыщтыр о плъэгъугъэмэ!
وَلَوْ تَرَىٰ إِذْ فَزِعُوا فَلَا فَوْتَ وَأُخِذُوا مِنْ مَكَانٍ قَرِيبٍ
52
Ахэмэ аIощт: "Тэ ащ шIошъхъуныгъэ шъыпкъэ фэтшIыгъ!" Ау а шIошъхъуныгъэр чыжьэ хъугъэ.
وَقَالُوا آمَنَّا بِهِ وَأَنَّىٰ لَهُمُ التَّنَاوُشُ مِنْ مَكَانٍ بَعِيدٍ
53
НахьыпэкIи ахэмэ Ар ашIошъ хъущтыгъэп, чIыпIэ чыжьэ щыIэхэу шъэфым фэгъэхьыгъэ гупшысэхэр зэфадзыжьыщтыгъэх.
وَقَدْ كَفَرُوا بِهِ مِنْ قَبْلُ ۖ وَيَقْذِفُونَ بِالْغَيْبِ مِنْ مَكَانٍ بَعِيدٍ
54
Ау ахэмрэ ахэмэ ашIоигъомрэ азфагу, апэкIэ щыIагъэхэм зэрафашIыгъагъэм фэдэу, зэпыгъэIыпIэ игъэуцуагъ. Шъыпкъэ дэдэмкIэ, зэхафын амылъэкIрэ джэнджэшым ахэр хэтыгъэх!
وَحِيلَ بَيْنَهُمْ وَبَيْنَ مَا يَشْتَهُونَ كَمَا فُعِلَ بِأَشْيَاعِهِمْ مِنْ قَبْلُ ۚ إِنَّهُمْ كَانُوا فِي شَكٍّ مُرِيبٍ